Batay Ouvriye Banner

ENTÈ-SENDIKAL PREMYE ME - BATAY OUVRIYE (ESPM-BO) _____________________________________________________________________

Okap Ayisyen, 14 jen 2002

POZISYON KOMITE OUVRIYE REVOKE KAY NOVELA KONSÈNAN

DEKLARASYON NONS ZEFI NAN LAPRÈS SOU MASAK GWASIMAL LA

Nou menm nan KOMITE OUVRIYE REVOKE kay Novela, n ap vin DEMANTI FÒMÈLMAN pakèt manti Nons Zefi vin bay nan laprès konsènan masak otorite lokal yo ansanm ak watchmann yo fè sou ti peyizan Gwasimal ki t ap òganize yo pou al travay chan an daprezavwa lizay ki egziste depi prèske 50 lane. Vreman vre, pou kapab wete kò l nan reskonsabilite sou masak sila a, Nons Zefi vin deklare devan laprès kouman li se yon patwon ki an jeneral gen bon kè, toujou boule trè byen ak ouvriye nan divès etablisman l ap dirije yo, toujou respekte sendika jan lalwa mande l elatriye...

Nou menm ki twouve revokasyon nou nan Etablisman Novela a senpman paske nou t ap revandike dwa nou, se pa 2 sezi nou pa sezi tande kozman sa a. Paske, daprezavwa sa nou konnen trè byen poutèt nou te anndan an, se AN ESKLAV patwon sila yo trete ouvriye nan etablisman yo, kote pyès dwa nou pa t janm respekte, malgre lalwa mande sa klèman. Ata an kolon mesye Zefi sa yo te konn boule ake nou an kolon kote yo te konn rive di nou “bese je nou!” lò yo t ap pale ake nou oswa menm lè yo t ap pase nan sal la. Lò koulye a nou mete kò nou an Sendika pou revandike dwa yo dwe nou ak pis fòs, se magouy sou magouy patwon sila yo kòmanse fè pou devye nou, achte nou, se enjerans, mannèv, presyon, entimikdasyon sou entimidasyon yo fè pou kraze sendika a, pandan yo pa t janm vle satisfè revandikasyon nou yo vre, malgre yo tout te jis e legal. Si nou rive rache 2-3 nan sa yo dwe nou, se te toujou nan gwo batay fas a ILEGALITE pèmanan patwon sila yo t ap fonksyone ladann la. Devan blokaj jeneral ki rive tabli lè direksyon an vin pa soti ankò pou menm resevwa nou e tande revandikasyon nou yo, nou vin deklare yon grèv kote legalman nou te prevni Ministè Afè Sosyal e ke nou te nan dwa nou nòmalman. Malgre sa, annik grèv la leve, direksyon a REVOKE TOUT KOMITE SENDIKA A AN JENERAL. Se nan sa nou tout retwouve nou deyò, abitrèman, an gwo ponyèt.

Ouvriye ki te rete anndan yo fòme yon lòt Komite pou dirije Sendika a e pwoteste kont zak abitrè sila a. Lè a, direksyon an touswit touswit chache kraze Sendika a ankò, kote li menm rive bat yon ouvriye ki t al diskite akey: se lopital ke chèf lapolis la, M. Fetyè, te oblije trennen ouvriye a lopital kote li fè 3 jou nan sewòm.

Jounen jodi, mesye Zefi sila yo vle fè kwè yo pa gen pwoblèm ak ouvriye ak sendika. Nou menm nou di: SE PI GWO MANTI! Mesye sa yo se pi gwo ESPLWATÈ, se pi gwo SANGINÈ!

Pandan n ap pote tout SOLIDARITE nou ak lit ti peyizan Gwasimal yo e ke n ap egzije liberasyon yo, reparasyon pou viktim yo ak arestasyon bouwo yo, nou te vin pòte Pozisyon sa a pou tout moun ka konnen pi mye ki sa frè Zefi sila yo reprezante devan travayè, sitou lè n ap reklame dwa nou!


Odilè DIWOZO; Sonia METELLUS; Christiana TELEON; Antoinier VINCENT; Evèk SAINT-LOUIS; Menvil JEAN-BAPTISTE, Emmanuel DALES


NOS DOSSIERS: