Batay Ouvriye Banner
Zanmikamarad,
 
Jan nou te anonse l, ansanm ak divès òganizasyon alye (Modèp, Pevep, Frakka, KRD, Antèn Ouvriyè, CATH - se Kan Pèp la k ap pran fòm, nan kad lit la menm) nou reyalize SITIN premye oktòb nou te prevwa a, anfas anbasad Brezil, nan Petyonvil (wè foto yo) anfas OKIPASYON an.
 
Anvan sa, gen yon lòt mobilizasyon nou te reyalize nan jou ki te 29 septanm lan devan ministè afè sosyal. Se te konsènan salè minimòm lan ki, selon lalwa pwòp reyaksyonè yo, te dwe ajiste nan dat premye oktòb 2010 la, e ke nou pa t wè pyès dispozisyon t ap pran pou sa reyalize. Sou kote sa, nou te pote revandikasyon pa rapò ak lekòl k ap fin dekrenmen, ansanm ak anplwaye revoke sèvis piblik yo ki pa janm ka touche sa leta dwe yo. Lèt kolektif la siyen pou remèt minis an fonksyon an atache.
 
Nan jou premye oktòb la, jan sa te anonse a, apeprè yon 50-60 moun te reyini pou make dezakò total nou ak prezans anvayisè yo ansanm ak politik pro enpeyalis y ap menen an, pandan yo vle fè nou kwè se "ede yo te vin ede pèp".
 
Sou yon lòt bò, nou te tou ap denonse pi resan asasina yo fè sou M. Jean Gilles nan Okap kote Mulet rive foure bouch li kareman nan zafè lajistis ayisyen pou chache kase fèy kouvri sa: yon lòt ekzaksyon pami tan dòt - tan dòt Minista ap fè sou tè d Ayiti, ak yon enpinite total, san konte prezans yo a k ap sal tè peyi nou a answa.
 
Mobilizasyon premye oktòb devan anbasad Brezil la se pou antame dènye liy dwat ansanm mobilizasyon nou te lanse soti 28 jiyè pou rive 15 oktòb la: ANFAS OKIPASYON MINISTA a, epi anfas tout sousou ak kolaboratè tout plim tout plimay ki te ede misyon sa a tabli e ki, jounen jodi a, ap jistifye epi soutni prezans sa a tèt kale. Se nòmal: gwo boujwa pro enpeyalis sila yo, mete ak tout ti sousou k ap sèvi yo, se YO Minista a vin defann konkrètman, yo menm ki se koutye kapital entènasyonal la e ki la pou detyi pwodiksyon nasyonal nou an ansanm ak diyite nou yon mannyè definitif. Se yon lojik trè klè. Se yon plan trè klè tou. E nou konprann li trè klè tou!
 
"ABA OKIPASYON! ABA MINISTA! ABA TOUT TRÈT! ABA TOUT MACHANN PEYI!" se nan pami prensipal eslogan foul la t ap lanse nan manifestasyon an.
 
Anplwaye anbasad la yo pa t janm soti. Okontrè, yo rapidman mete kadna dèyè pòtay la, fèmen pòt kay la epi disparèt anndan an. Nou menm, sou do pòtay la, sou mi yo ak anba fil babele yo, nou kite mesaj nou yo klè menm jan an.
 
Piplis lè a t ap pase, se piplis manifestasyon an te vin ap gen plis moun (wè foto yo). Vè midi, li te vanse ap fini. Se lè a yon atache l ONI (yo gen konfimasyon idantite sa a daprezavwa dokiman li remèt lapolis la) kidonk atache l ONI sa a vin ap parèt nan yon machin byen founi kote li deklare li vle franchi sou foul la an gwo ponyèt pou li pase (ak okipasyon an, makout modèn sa yo santi yo chèf tout bon!). Malgre pwotestasyon nou, malgre lapolis ki te sou plas la e ki, li menm, mande msye fè bak, atache l ONI a rale zam li sou manifestan yo epi egzije pou yo ba l pasaj! Lè a, foul la ki vin santi l an danje, reyaji, ansèkle l epi kraze vit machin la pou atache sila a ka resi kanpe sou aksyon kriminèl li. Apre divès pawòl ajitasyon pa nou ansanm ak moun nan kan plas Bwaye yo ki te vini an foul tou, lapolis ale avèk li.
 
Fò n di pandan altèkasyon yo, 2 machin Minista te parèt tèt yo. Militè ki te ladan yo vanse vle vin pale ak pòtpawòl nou. Lè a nou fè yo konnen trè klè nou pap an rapò avèk yo! NOU PA REKONÈT PREZANS MINISTA NAN PEYI A! kidonk nou pap pale pyès kozman ak pyès nan yo. Lapolis Nasyonal la la, se ak li sèl n ap trete kesyon an. Lè a, yo vire do yo epi lapolis ale ak vakabon an (foto yo bay repòtaj tout evènman sa yo an gwo tou).
 
Pandan menm jounen an, jan nou te anonse sa, nan Nouyòk te gen yon sitin Rezo Solidarite ak Batay Ouvriye te òganize devan konsila Brezil la. Menm si li pa t gen kantite moun nou te espere (lapli a te fò anpil), li te trè anime tou. Menm jan an, nan lari lavil Okap ak Plezans, manifestasyon anfas Okipasyon an te pran lari tou, ak apwobasyon jeneral tout popilasyon manifestasyon sila yo te kwaze sou pakou yo: fò n ka konnen, analize, konprann epi kanalize apwobasyon jeneral pèp ayisyen an devan manifestasyon sa yo.
 
Menm jan an, li ENPÒTAN, li NESESÈ pou tout pwogresis konsekan pote kole ak nou tout kote yo kapab nan kad mobilizasyon KONT OKIPASYON sa yo, pou sila yo ka PRAN FÒS, dekwa pou nou ka KANPE TOUT BON ni anfas Okipasyon-Titèl Minista a answa, ni anfas sousou k ap sèvi yo, ni anfas makout modèn k ap reparèt yo, ni anfas tout sistèm dominan, kowonpi ak imilyan yo soti pou blayi nan figi nou epi foure nan gagann nou an.
 
BATAY LA FENK KÒMANSE!!!